Një burrë në Florida goditi me thikë për vdekje kolegen e tij pasi ajo refuzoi ftesat e tij për të dalë së bashku në takim.
Sipas The Independent, 20-vjeçari Agustin Lucas Mariani sulmoi me thikë kolegen e tij Delfina Pan javën e kaluar pasi u shfaq në shtëpinë e saj pa paralajmëruar, tha policia në Florida. Mariani dhe Pan, të cilët të dy raportohet se janë argjentinas, kanë punuar së bashku në restorantin Kansas Bar and Grill dhe mësohet se ajo i ka refuzuar vazhdimisht kërkesat e tij për të dalë në një takim.
Policia e Miami Beach tha se ai u shfaq në shtëpinë e Pan në North Beach të hënën vonë më 29 nëntor, i paftuar dhe priti viktimën. Kur Pan arriti në banesën e saj, Mariani i kërkoi asaj që ta linte të hynte në apartament, gjë që ajo refuzoi ta bënte.
Ai më pas nxori një thikë dhe goditi viktimën pa u provokuar aspak sikur të kishte kohë që e kishte menduar këtë gjë. Mariani më pas hoqi këmishën e tij dhe goditi veten me thikë në pjesën e sipërme të gjoksit, sipas një fqinji që pa ngjarjen. Policia tha se goditja e tij me thikë ishte jo fatale. Me të arritur në vendin e krimit, oficerët thanë se e gjetën të akuzuarin të shtrirë të plagosur mbi viktimën e tij.
Të dy u dërguan me urgjencë në Spitalin Memorial Jackson, ku gruaja u shpall e vdekur. Mariani raportohet se po shërohet nga plagosja. Thika e përdorur në vrasje me sa duket është marrë nga restoranti Kansas Bar and Grill, sipas policisë.
