Reshjet e dendura të shiut kanë shkaktuar përmbytje në disa zona në jug të vendit. Ura e Mesapikut në Selenicë është jashtë funksionit pasi si pasojë e reshjeve të shumta është e pakalueshme. Ndërkohë lumi Vjosë ka rritur nivelin në 5.9 metra, por pa probleme.
Prurjet vijojnë të rriten ndërsa pika kritike është 7.3 metra. Situata po mbahet nën monitorim.
Probleme ka pasur edhe në përroin e Çullos në lagjen Granicë të Gjirokastrës i cili ka dalë nga shtrati duke shkaktuar problematika në disa zona të qytetit ku rruga e automjeteve është bllokuar si pasojë e rrëshqitjeve të dheut.
Bllokime ka pasur edhe në segmentin rrugor në Rredhin e Badlonjës në rrugën nacionale Përmet-Tri Urat, si pasojë e rrëshqitjes së dherave.
Patrulla e qarkullimit ndodhet në vendin e ngjarjes për të normalizuar situatën.
