Spartak Braho paralajmëroi nga Zona Zero në Top News për skenare dhune gjatë protestës së thirrur nga Sali Berisha ditën e shtunë.
Braho tha ndër të tjera se në këtë protestë, Berisha do të kërkojë një “sakrificë” dhe për këtë është shënjestruar një deputet, mbështetës i Bashës. Ish-deputeti socialist nuk e tha emrin, por shqiptoi inicialet e tij E.A.
Me këto iniciale, deputet i Partisë Demokratike është Enkelejd Alibeaj. Ky i fundit mban postin e nënkryetarit të Partisë Demokratike dhe në daljet mediatike është shprehur qartë kundër Sali Berishës.
Por çfarë deklaroi Spartak Braho në Zona Zero?
“Mos të keni iluzion se nuk do të ketë dhunë. Do të ketë nga këta që edhe nuk përmbahen, nga të dhënat që kam unë mund të ketë edhe vrasje. Një personalitet deputet, me inicialet…, rrezikon të vritet nesër. Berisha nuk bën dot pa gjak. Deputeti me inicialet E.A, të ruhet, këtë këshillë ia jap të ruhet nesër. Janë situata që dalin nga kontrolli, edhe ai nuk e ka problem se e thotë si me Azem Hajdarin që nuk e vrava unë, por Izet Haxhia”, tha Braho.
I pyetur se ku ka i ka marrë këto informacione, Braho nuk dha detaje, por paralajmëroi deputetin që të ruajë krahët.
