Deputeti i Partisë Demokratike Tomor Alizoti shprehu keqardhje për momentin kritik ku ka arritur partia më e madhe opozitare teksa ditën e sotme pati përplasje të dhunshme në selinë blu. Ai fajësoi kryetarin aktual të PD Lulzim Bashën dhe paraardhësin e tij Sali Berisha si personat përgjegjës të krijimit të kësaj krize. Në “ABC News”, Alizoti tha se PD ka vdekur sot politikisht, ndërsa shtoi se Basha është jashtë ccdo koncepti politik.
“PD sot është në një krizë të tmerrshme morale. Çdo demokrat që e ka parë atë skenë sot, është që pas 30 vitesh shikoj policinë në PD. Partia jonë ka thënë se kjo është policia e krimit. Për mua prezenca e policisë në një parti të djathtë, do të thotë se partia ka ‘vdekur politikisht’. Për cfarë i duhet kryetarit aktual vula dhe godina?
Për cfarë duhet beteja më? Nuk mund të përdorej gaz ndaj vartësve të vet. Kjo parti nuk ka prodhuar asnjë mendim dhe koncept dhe zotëria që është aktual në PD nuk ka fituar asnjë garë. Ku ka të ardhme PD-ja me këto figura. PD sot është në trishtimin më të madh. Opinioni që sot pa këto pamje është shokur.
Kriza zgjidhet me negociata dhe jo, ‘do rri unë dhe vdiqa’. Një nga themeluesit e kësaj krize është edhe Berisha, këta janë të dy bashkëfajtorë, por asnjë nuk lëshoi pe. Të dy do të luftojnë të marrin sa më shumë demokratë. Shikoj zotërinë aktual që nuk e quaj as kryetar, është jashtë cdo lloj sfere, jashtë cdo koncepti politik.
Roja i selisë iku që të mos përfshihej në këtë turp. PD ka nevojë për dinjitet dhe alternativë. Berisha që kam dashur dhe dua duhet të kontribuojë për demokratizimin. Bashën nuk e kuptoj çfarë vazhdon dhe bën më aty.
Berisha dhe Basha janë pjesë e problemit, duhet të zgjidhin krizën urgjentisht. Ky akt e fundosi Bashën sot përfundimisht në sytë e mi”, deklaroi deputeti demokrat Tomor Alizoti.
