Më 22 janar 1997 u rrah barbarisht në shtëpinë e tij në Tiranë, pedagogu i atëhershëm i Akademisë së Arteve, kryeministri i sotëm i Shqipërisë Edi Rama. Lajmin atë kohë e pati botuar “Koha jonë”. Sipas lajmit të botuar nga ‘Koha Jonë’ atëherë Rama po përgatiste një intervistë kundër pushtetit të Berishës.
Lajmi për ngjarjen, i botuar më 23 Janar 1997 në KOHA JONË
Mbrëmë në mesnatë rrihet barbarisht Edi Rama
Mbrëmë në mesnatë persona të panjohur kanë goditur me hekura në kokë piktorin e njohur Edi Rama. Rama, i cili sapo është kthyer në Tiranë pas një specializimi në Francë, ndërkohë që ishte duke shkruar një intervistë mjaft të ashpër ndaj politikës së Berishës për ta botuar në gazetën “KOHA JONE”. Pas kësaj ngjarjeje, ai është shoqëruar në spital dhe ende nuk dihet gjendja shëndetësore pas plagëve të rënda./23 Janar 1997/
