Aktori e komediani i njohur Agron Llakaj, që është shumë aktiv në rrjetet sociale, ka publikuar foton e një shofereje autobuzi, e cila nuk dihet nëse i ka ardhur nga dikush apo është e shkrepur nga ai vetë.
Nuk dihet as nëse fotoja është shkrepur në Tiranë, ç’është e vërteta. Por Llakaj ka tërhequr vëmendjen me shënimin e tij sipër fotografisë, që është postuar me synimin për të shkaktuar të qeshura: “Kur shoh një grua që nget një autobus, jam i lumtur për evolucionin e shoqërisë në aspektin e barazisë gjinore,… dhe pastaj pres autobusin tjetër për t’ia hipur”.
Shakaja e tij seksiste i bën jehonë një perceptimi popullor në Tiranë, sipas të cilit gratë nuk janë të zonjat në timon. Nuk dijet nëse ky perceptim ka lidhje me realitetin në Shqipëri, por studimet jashtë tregojnë se kur vjen puna te aftësitë diferencat janë të vogla në favor të burrave. Por kur vjen puna te grahja e sigurt e një mjeti gratë janë në avantazh, pasi shumica e aksidenteve bëhen nga burrat, të cilët ecin më shpejt dhe kanë vetëbesim të tepruar, gjë që i bën të përdorin celularin në makinë, t’i japin makinës në gjendje të dehur e të bëjnë më shumë aventura në rrugë.
Kjo qasje e burrave në makinë është reflektuar edhe në komentet që të tjerët kanë bërë poshtë shënimit të Llakajt. Një pjesë e komentuesve e kanë shijuar shakanë, por të tjerë janë ndalur tek qasja mizogjinike e aktorit të njohur.
Në fakt, humori në shfaqjet televizive shqiptare karakterizohet nga një seksizëm i fortë.
