Partia Socialiste në zgjedhjet e 6 marsit në Shkodër do të kandidojë për kryetare bashkie prefekten Majlinda Angoni. Ndërkohë që në Dibër, kryesia e PS-së vendosi që t’i besonte biznesmenit Rrahim Spahiu, duke mos vazhduar me kryetarin e komanduar Shkëlqim Murjan.
Emirjana Sako, do të jetë kandidate për kryetare bashkie në Durrës. Në Rrogozhinë socialistët ia kanë besuar garën Edison Memollës, ndërsa në Vorë kandidat do të jetë Blerim Shera. E vetmja bashki, ku kandidati për kryetar bashkie nuk u vendos sonte ishte Lushnja.
Drejtuesi politik i qarkut të Lushnjes Taulant Balla u shpreh për mediat se kandidati për Lushnjen do të zyrtarizohet ditën e martë, pasi ende janë në proces konsultimi. Favorite është Eriselda Sefa, e cila aktualisht është e komanduar.
Nuk u përmbyll dot sot, kjo tregon se ky proces nuk është fake, por i vërtetë. Kryetari i ri i bashkisë Lushnje do të jetë një person që ka përgatitjen e duhur për të çuar përpara projekte të mëdha. Kjo zonë është “hambari” i Shqipërisë. PS garon për t’i fituar të gjashta bashkitë” tha Ballla.
“Në jemi gati të hyjmë në zgjedhje me kandidaturat më të mirë dhe pse jo t’i fitojmë të gjitha, të gjashta bashkitë” tha sekretari i përgjithshëm i PS-së, Damian Gjiknuri.
