Një 49-vjeçare spanjolle u arrestua për vdekjen e nipit të saj 5-vjeçar në Earlsdon, Coventry të Mbretërisë së Bashkuar. Elena Anghel dyshohet se ka vrarë me thikë nipin e saj David Mario Lazar në banesën e saj. Fëmija i ishte lënë gjyshes së tij nga prindërit për t’u kujdesur pasi ata ndodheshin në punë.
Ekzaminimet mjekësor treguan se vogëlushi David ka humbur jetën si pasojë e një plage thike. Policia britanike raporton se e ka kategorizuar Anghel në Aktin e Shëndetit Mendor, duke konsideruar se ajo vuan nga probleme të shëndetit mendor.
“Ai ishte një djalë shumë i gëzueshëm. Gjithmonë qeshte që kur zgjohej deri kur flinte. Kishte shumë energji. I pëlqente të kërcente dhe këndonte”, shprehen të dëshpëruar prindërit e tij Cristina dhe Dorinel.
Shërbimi mjekësor tha se pavarësisht ndihmës së shpejtë, ishte e pamundur që vogëlushi të shpëtonte.
“Ambulanca menjëherë filloi t’i jepte ndihmën urgjente djaloshit, por fatkeqësisht, pavarësisht përpjekjeve të shumta, ishte pamundur që të shpëtohej jeta e djalit. Ai ndërroi jetë në vendngjarje”, tha zëdhënësi i Shërbimit të Ambulancës së West Midlands.
