Nipi i Jozef Stalinit, njeriu që sundoi Bashkimin Sovjetik me grusht të hekurt për tre dekada, ka rënë pre e mashtruesve në Moskë. Mashtruesit arritën t’i nxjerrin me kthetra qindra mijëra dollarë të moshuarit në harkun kohor të disa muajve, raportojnë mediat ruse.
Të mërkurën e kaluar, një burim i zbatimit të ligjit tha për ‘TASS’ se Leonid Alliluyev, një veteran 93-vjeçar i Luftës së Dytë Botërore, kishte kërkuar ndihmë nga policia pasi të dënuarit e bindën atë të transferonte 16 milionë rubla (mbi 213,000 dollarë) vjeshtën e kaluar.
Pavarësisht mashtrimit të supozuar të ndodhur muaj më parë, Alliluyev iu drejtua policisë vetëm më 8 shkurt.
Shërbimi për shtyp i Departamentit të Policisë së Moskës konfirmoi për ‘TASS’ se pensionisti kishte kontaktuar me ta. Sipas rrëfimit të tyre për ngjarjet, veterani i luftës mori një telefonatë nga një i panjohur në fillim të shtatorit, i cili u prezantua në mënyrë të rreme si punonjës banke.
Personat e mashtruan Alliluyev që t’i transferonte paratë nga llogaria e tij për ta mbrojtur atë nga mashtruesit. Gazeta e lajmeve ‘MKRU’ raportoi se bankierët e rremë i thanë pensionistit të dërgonte fonde në disa llogari “back-up” , një lëvizje që ata këmbëngulnin se do ta parandalonte atë të binte viktimë e mashtrimeve. Pasi i moshuari u nda me paratë e tij, mashtruesit ndaluan ta telefononin.
Alliluyev është djali i motrës së gruas së dytë të Stalinit, Nadezhda Alliluyeva, e cila ishte e martuar me ish-kryeministrin sovjetik nga viti 1919 deri në 1932. Pas një debati me Stalinin, Alliluyeva i mori jetën me një të shtënë me armë zjarri.
Megjithatë, kjo nuk është hera e parë që mashtruesit tentojnë të mashtrojnë 93-vjeçarin. Në vitin 2021, një ndërhyrës u përpoq të vidhte pesë milionë rubla (pothuajse 66,500 dollarë) nga pensionisti. Ajo u kap në flagrancë nga policia në banesën e tij teksa ai po dorëzonte paratë. Gruaja u dënua me tre vjet e gjysmë burg.
