Mbretëria e Bashkuar ka prezantuar disa sanksione të reja kundër Rusisë, duke përfshirë një ndalim për anijet me lidhje ruse për të hyrë në portet britanike, njoftoi qeveria në një deklaratë .
“Ndalimi i anijeve ruse nga portet e Mbretërisë së Bashkuar dhe sanksionet e reja ekonomike kundër institucioneve kryesore financiare ruse, përfshirë bankën e saj qendrore. Në koordinim të ngushtë me aleatët tanë, do të degradojnë ekonominë e Rusisë dhe do të ndihmojnë që Putini të humbasë”, tha Sekretarja e Jashtme britanike Liz Truss, për CNN.
“Masat ekonomike shtesë kundër Bankës Qendrore Ruse dhe fondit të pasurisë sovrane të shtetit, nënkuptojnë gjithashtu se shumica e sistemit financiar të Rusisë mbulohet tani nga sanksionet e Mbretërisë së Bashkuar”, thuhet në deklaratë.
Duke filluar nga e marta, të gjitha portet e Mbretërisë së Bashkuar do të largojnë çdo anije që është me flamur rus dhe që është e regjistruar, në pronësi ose e operuar nga Rusia.
“Duke ndaluar anijet ruse nga portet tona, ne po izolojmë më tej Rusinë dhe po dërrmojmë aftësitë e saj ekonomike, duke e lënë urie makinën luftarake të Putinit”, tha Sekretari britanik i Transportit Grant Shapps.
