Nga Emili Bibolli*
Është fatkeqësi për Shqipërinë që nga zgjedhje në zgjedhje shkojmë me të njëjtat forca politike te vjetëruara dhe të njëjtët politikanë, ideologjia e së cilëve ka qënë dhe mbetet pragmatizmi i pastër, dhe qëllimi real i marrjes së pushtetit ka qënë dhe mbetet kryesisht përfitimi personal. Nën rrethana të tilla dhe në “pamundësi” për të ndryshuar fatin tonë, nuk na mbetet gjë tjetër veçse të mjaftohemi me partitë që kemi edhe këtë herë.
48 orë na ndajnë nga votimet për zgjedhjet e pjesshme vendore. Zgjedhje që do të jenë njëkohësisht edhe indikatori kryesor për vijimësinë e zgjedhjeve lokale të 2023. Javën e ardhshme do të kemi një panoramë të qartë se cila forcë politike ka hedhur hapa drejt progresit, e cila ka hedhur hapa drejt regresit, dhe jo vetëm.
Në Partinë Demokratike, 6 Marsi nuk është thjesht një garë për 6 bashkitë, por edhe gara e fundit për liderin definitiv të saj. Garë kjo, që nëse do të jetë e vërtetë dhe pa manipulime, do të nxjerrë në dritë nëpërmjet votës, se cilin ka vendosur shumica dërrmuese e demokratëve t’i udhëheqë. Pas kësaj, çdo debat, sulm apo justifikim nuk ka më asnjë efekt.
Por fitorja brenda Partisë Demokratike është sa e rëndësishme për demokratët aq dhe e pavlerë. E rëndësishme sepse do udhëhiqen nga i zgjedhuri i tyre dhe dilemat do të zhduken, e pavlerë sepse legjitimiteti final i kryetarit të partisë nuk mund të vlejë më shumë se sa fitorja në zgjedhjet e pjesshme lokale pas 3 vitesh defiçiti të theksuar të pushtetit lokal.
Me përfundimin e zgjedhjeve nuk ka më kthim pas. Nëse z.Berisha, apo z.Basha, apo të dy bashkë nuk arrijnë përsëri të fitojnë përballë Partisë Socialiste, njëri pas 30 vitesh e tjetri pas 17 vitesh në politikë, të ndjekur vazhdimisht kush nga skandalet e kush nga disfatat, duhet të largohen përgjithmonë nga arena politike.
Në të kundërt, Shqipëria do të shndërrohet në një vend monopartiak, me një superfuqi socialiste në krye të vendit, një shoqatë demokratike përballë saj dhe një popull të dorëzuar para realitetit.
Posaçërisht për Fjala.al
