Korrespondenti i “Fox News”, Benjamin Hall, ka bërë komentet e tij të para publike të enjten, që kur ai dhe kolegët e tij u sulmuan gjatë një raportimi në Ukrainë.
Hall ka rrëfyer detajet e tmerrshme që pësoi gjatë sulmit, ku u vranë dy kolegët e tij, kameramani Pierre Zakrzewski dhe Oleksandra “Sasha” Kuvshynova.
Në fillim, ai u shpreh se ndihet “shumë me fat që ishte këtu”.
“Kanë kaluar më shumë se 3 javë që nga sulmi në Ukrainë dhe doja që t’i ndaja të gjitha”, shkroi Hall në “Twitter”, i cili shtoi se fillimisht donte që të bënte homazhe për kolegët e tij të ndjerë.
“Pierre dhe unë udhëtuam nëpër botë së bashku, puna ishte gëzimi i tij dhe gëzimi i tij ishte infektues”, shkruan ai.
Hall gjithashtu postoi një fotografi të tij në një barelë ku bashkëngjitur me të shkruante:
“Për ta përmbledhur, kam humbur gjysmën e këmbës nga njëra anë dhe një këmbë në anën tjetër. Njëra dorë është duke u bashkuar, një sy nuk po funksionon më. Dëgjimi im është mjaft i fryrë”.
Korrespondenti ishte duke raportuar pranë Kievit së bashku me dy kolegët kur automjeti i tyre u godit nga zjarri, më 14 mars, tha “Fox News” në një deklaratë në atë kohë.
Hall i mbijetoi sulmit dhe u evakuua nga Ukraina disa ditë më vonë, por Zakrzewski dhe Kuvshynova u vranë.
