Në seancën e sotme plenare në Kuvend ka patur një debat të ashpër mes ministres Elisa Spiropali dhe ish-kryeministrit Sali Berisha.
Teksa ky i fundit në foltoren e Kuvendit ka hedhur akuza ndaj qeverisë, nuk ka munguar dhe replika e Spiropalit e cila e ka konsideruar si gjeneralin e një ushtrie, që mendon se është i gjallë.
Nga Kuvendi, Spiropali i tha Berishës nuk e ‘mund dot më Shqipërinë’, teksa i kujtoi atij se në një kohë kur denoncon korrupsionin në qeveri është i shpallur ‘non grata’ nga SHBA.
“Tre piramida ke ndërtuar në jetë, ato financiare që rrënuan Shqipërinë, ato arsimore që bënë analfabet të rinjtë dhe atë politik në majë të së cilës ti nuk ngjitesh më sepse nuk je gjenerali i ushtrisë së vdekur, por i një ushtrie që ti mendon se je gjallë. Doja ta pyesja Flamurin, pse mendon se ju jeni gjallë politikisht? Të gënjen mendja që munde Lulin, por edhe 7 jetë të jetosh nuk e mundon dot PS dhe Edi Ramën. Nuk e mund dot më Shqipërinë. Ka bërë shumë rrugë, të ka lënë pas. Hija është më e madh ese drita që lëshoni aty-aty për të verbuar ata që ju ndjekin. Flet për krimin në qeveri, por nuk dua të të kujtoj certifikatën që e ke marrë me shumë nder. Harron që ishe ti ai që dilte krenar e thoshte ishte vendim politik të kanabizohej Lazarati dhe nuk mbajte kurrë përgjegjësi. Ne i lexojmë raportet, shohim dhe kritikat, por nuk jemi euforik të flasim për ato çështje që raporti thotë. Vetingu është procesi thelbësor që po pastron sot drejtësinë. Ne i kemi humbur disa beteja, por kemi fituar luftën sepse Shqipëria nuk përmendet më si vend problematik për kultivimin e kanabisit. Ne duam të legalizojmë një ekonomi që ti e mbaje si ilegale”, tha Spiropali.
Nga ana tjetër Berisha tha se nuk mund t’i përgjigjet Spiropalit ‘siç e meriton’ sepse ‘gjuha ime frenohet para një zonje’.
“Zonja që foli që thirret ‘zonja 5 mln’ nuk hyn tek anëtarët e mëdhenj të organizatës, por si anëtare. Ndaj dhe ju keni në bord të dilni dhe të shani me gjuhë ordineri, të përdorni fjalë se një grua që i thotë vetes e tillë nuk janë lejon vetës fjalë të tilla. Jo se më mundon fjalori, por goja ime frenohet, kur vjen problemi para një zonjë”, tha ai.
