Ministri i Brendshëm Bledi Çuçi ditën e sotme zhvilloi një takim me drejtorët e policive dhe shefat e komisariateve. Në një deklaratë për mediat Çuçi tha se gjatë takimit u bë një analizë e përgjithshme për 4 mujorin e kaluar edhe për atë të ardhshëm.
Gjithashtu ai tha se një tjetër temë për të cilën u diskutua është dhe ajo e kanabisit për të ndëshkuar këdo që kultivon në mënyrë të paligjshme.
Sa i përket rritjes së rrogave të efektivëve të policisë, Çuçi tha se ka patur një ngadalësim të këtij procesi për shkak të krizës, mirëpo muajin tjetër do të realizohen.
“Sot ishte për të bërë një analizë të përgjithshme me të gjithë drejtorët e policisë. Bëjmë një analizë të planit të veprimit për 4 mujorin e parë dhe atë të ardhshëm. Fokusi është kultivimi i kanabis, toleranca është zero. Ishte takim pune dhe i zakonshëm, përbën interes por nuk është takim i jashtëzakonshëm. Kanabis është çështje që diskutohet dhe me strukturat, ka një tendencë për të konfunduar inciativën e qeverisë. Qëllimi është i qartë, tolerancë zero ndaj kultivimit të kanabis të paligjshëm. Po mbyllen procedurat me akte nënligjore. Kemi pasur një ngadalësim të këtij procesi me krizën që ndodhi por shumë shpejt, në mos gaboj në muajin tjetër, të gjitha ato që kemi parashikuar në buxhetin e shtetit do të realizohen”, tha ministri.
