Pamjet e rënda nga dita kur kineastja 42-vjeçare, Halina Hutchins, humbi jetën në xhirimet e filmit “Rust” nga arma e shkrepur nga aktori Alec Baldwin, janë publikuar ditën e sotme.
Një video e publikuar nga Daily Mail tregon Halinën e gjakosur dhe të shtrirë në tokë brenda një kishe, me mjekët që bëjnë çdo përpjekje për ta mbajtur atë në jetë.
Anëtarët e personelit paramjekësor, në fakt duket se janë mbi të dhe dëgjohen duke bërtitur “Halina, rri me ne”. Megjithatë, ajo duket se është pa ndjenja dhe nuk i përgjigjet thirrjeve të tyre.
Në një video tjetër të publikuar nga gazeta britanike, anëtarët e stafit, teknikët dhe aktorët, përfshirë Alec Baldwin, dëgjohen duke pyetur për gjendjen e saj shëndetësore. Kur Aleku e pyeti se si ishte, mjekët u përgjigjën se gjërat ishin “pak më të rënda” nga sa do të dëshironin.
Pamjet tronditëse nga momentet e fundit të 42-vjeçares janë regjistruar nga një aparat fotografik trupor dhe janë publikuar dje nga zyra e sherifit të Santa Fe në New Mexico si pjesë e provave nga ngjarja fatale e 21 tetorit 2021.
Sherifi deklaroi se hetimet janë në vazhdim pasi çështja mbetet e hapur. Po ashtu, ai ka shpjeguar se priten rezultatet e ekspertizës balistike dhe mjeko-ligjore të FBI-së, si dhe analiza e gjurmëve të gishtërinjve dhe ADN-së.
Më 21 tetor të vitit 2021, gjatë xhirimeve të filmit Rust, aktori Baldwin ka shkrepur armën, e cila presupozohej të kishte plumba ‘falco’ duke lënë të vdekur kinematografen me prejardhje nga Ukraina.
