Nga merkato, tek fundi i kampionateve dhe kompeticioneve europiane e një mori lajmesh të tjera, këto janë titujt kryesorë të mediave më të njohura sportive:
“Koulibaly prioritet për qendrën e mbrojtjes së Barcelonës” është titulli i gazetës “SPORT”.
“Klasikja” është titulli i “Mundo Deportivo”, e cila vendos në fokus sfidë mes Realit dhe Barcelonës në basketboll, që do të luhet në Beograd.
“Luka Modric legjendë e pafundme”, shkruan “MARCA”, e cila mban kroatin në faqen kryesore, i cili ka qenë një futbollist thelbësor edhe për këtë sezon tek madrilenët dhe mbi të gjitha i premton besnikëri klubit merengues.
“El Klasiko e Europës” shkruan “AS”, që gjithashtu ka në fokus sfidën mes Real Madrid dhe Barcelona në basketboll.
Kryefjala e faqes së parë të “Estadio Deportivo” është fitorja e trofeut të Europa League nga Eintracht Frankfurt me titullin: “Në lartësinë e Sevillas”.
“Një hije dyshimi mbi Sampaolin” është titulli i “L’Equipe” për trajnerin e Marseille që është në dyshim për sezonin e ardhshëm.
“Leao vlen 100 milionë” është lajmi kryesor i “La Gazzeta dello Sport”, e cila flet për yllin portugez të Milanit që ka shpërthyer këtë sezon dhe po udhëheq kuqezinjtë drejt titullit të 19-të kampion në Serie A.
“Corriere dello Sport” zbulon merkaton e Juves me titullin: “Pogba është zgjidhja!” . Milinkovic Savic kushton shumë, De Ligt do të rinovojë, kështu që rikthimi i francezit, të dashur edhe nga tifozët do të ishte zgjidhja e pëlqyer nga të gjithë. Ndërkohë Corriere ka hapësirë edhe për Mourinhon i cili deklaron se finalja e Tiranës është më e rëndësishmja nga të gjitha për të.
