Zgjedhja e Presidentit të ri është çështja më e nxehtë në politikën shqiptare për momentin. Maxhoranca dhe Opozita nuk po bien ende dakord për një emër ndërkohë, disa prej kandidatëve të mundshëm janë propozuar dje nga të djathtët.
Me emrat e propozuar nga opozita, nuk ra dakord deputeti Agron Gjekmarkaj.
Gjekmarkaj tha se do të ishte mirë që opozita të sillte propozime serioze, teksa përmendi disa emra si Fatos Lubonja, Mark Markun, Jozefina Topallin, Artan Fugën etj.
Surprizë nga propozimet e Gjekmarkaj ishte emri i Jozefina Topallit, aq më tepër pas atij debati që ata zhvilluan në një studio televizive rreth 1 vit më parë.
Topalli i tha Gjekmarkajt se ai nuk ka asnjë kontibut në Partinë Demokratike dhe se fjalët e tij nuk i interesojnë. Sipas Topallit, Gjemarkaj ka qenë që në fillim kandidat i Bashës, por në studio televizive shfaqej si analist.
“Ka disa vite që është kandidat i Lulzim Bashës, por shfaqej si analist. Analistat duhet të jenë të pavarur në mendimet e tyre dhe jo të përdorin fjalorin që ua imponojnë kryetarët e partive. Armiku i kandidatëve të Bashës nuk është Edi Rama, por Jozefina Topalli. Janë detyruar të thonë se Jozefina është e shitur te Rama, po dëmton PD-në.
Agroni ka kohë që e bën, para se të siguronte mandatin e deputetit në Lezhë. Agron i dashur, mua nuk më bën përshtypje çfarë thotë një njeri që nuk ka asnjë kontribut në PD. Të më thuash mua se nuk sulmoj Edi Raman, më vjen për të qeshur se jeni me 8 vite vonesë. Kur unë flisja, ju nuk flisnit për gjërat më të rënda.”, i tha Topalli
