Kreu i Policisë së Shtetit, Gledis Nano, ka mbajtur për shtyp për përfundimin e finales së UEFA Conference League, që u zhvillua mbrëmjen e kaluar në stadiumin “Air Albania”, dhe ku nuk munguan tensionet e përplasjet mes tifozëve.
Në fjalën e tij, teksa vlerëson punën e Policisë së Shtetit për planin e masave, Nano thekson se kanë ndodhur 3 incidente, konkretisht:
-goditja me mjete të forta ndërmjet një grupi të tifozëve të Holandës dhe qytetarëve shqiptarë, për të cilin u arrestuan dy tifozë holandezë;
-përplasja e dhunshme me Policinë e një grupi tifozësh holandezë;
-përplasja e dhunshme me Policinë e një grupi tifozësh italianë.
Sipas kryepolicit Nano, nga përplasjet e dhunshme kanë mbetur të plagosur 19 punonjës policie, duke shtuar se “është parandaluar në kohë përplasja me pasoja e grupeve të tifozëve të të dy skuadrave, të cilëve Policia iu sekuestroi thika, shkopinj druri, leva hekuri, pllaka guri, shishe qelqi e sende të tjera të rrezikshme për jetën e shëndetin. Në vijim të masave, krahas ndjekjes ligjore duke përcjellë materialet hetimore në Prokurori, Policia e Shtetit dëboi jashtë vendit, 80 tifozë ultras të skuadrës së Romës”.
