Luiza Gega nuk di të ndalet. Atletja pasi nuk arriti të thyente rekordin kombëtar në mitingun e Manchesterit ia ka dalë së fundmi në Holandë në “FBK Games 2022” që po mbahet në Hengelo.
Shqiptarja në 3000 metra me pengesa e ndali kohën në 9:15.48 duke thyer me rreth 4.5 rekordin e mëparshëm që kishte vendosur po vetë në vitin 2019 (9:19.93 në Botërorin e Dohas).
Rezultati 9:15.48 i dha vendin e dytë në garë Luizës, e cila u dha leksion edhe kenianeve elitare të cilat i kishte konkurrente në eventin e mbajtur në Holandë. Kenia është gjithashtu edhe vendi ku prej disa vitesh stërvitet Gega.
Sa i përket Garës u fitua nga ugandezja Peruth Chemutai me kohë 9:14.00, e cila është edhe kampione në olimpiadën e fundit që u mbajt në Tokio. Kështu Luiza Gega konfirmon edhe një herë tjetër momentin e saj të artë, teksa mbetet e vetmja sportiste e atletikës shqiptare që për vite me radhë arrin që të jetë brenda normës Botërore dhe Europiane.
