Komisioneri i BE-së për Menaxhimin e Krizave Z. Janez Lenarčič vizitoi sot kopshtin “1 Qershori” në Durrës, në prezencën e Kryetares së Bashkisë Durrës Znj. Emiriana Sako, përfaqësuesve të BE-së dhe UNDP-së në Shqipëri, stafit mësimor dhe fëmijëve.
I riparuar në kontekstin e Programit “EU4Schools” prej më shumë se një viti, kopshti “1 Qershori” i shërben 163 fëmijëve, 10 edukatoreve dhe 12 mijë banorëve të komunitetit.
Gjatë kësaj vizite, Komisioneri Lenarčič vizitoi ambientet moderne të kopshtit, ndërveproi me fëmijët, si dhe ndoqi nga afër një orë mësimore ekstra-kurrikulare (simulim) se si fëmijët duhet të reagojnë në rast rreziku të një zjarri.
23 objekte arsimore janë rindërtuar ose riparuar deri më tani falë #EU4Schools dhe i shërbejnë drejtpërdrejtë 7,325 fëmijëve/nxënësve e 445 mësuesve. Ndërkohë, puna vijon me intensitet të lartë në 16 objekte të tjera arsimore, të cilat janë në proces rindërtimi apo riparimi.
Programi financohet nga #BE me 75 milion Euro dhe zbatohet nga #UNDPAlbania, duke u mbështetur në dy parime kyçe: #RindërtojmëMëMirë dhe #RindërtojmëSëBashku. Pjesë e tij janë institucionet arsimore, të cilat janë dëmtuar rëndë si pasojë e tërmetit shkatërrues që goditi Shqipërinë në nëntor të vitit 2019-të.
