Që prej ditës së djeshme, mediat spanjolle raportuan për vrasjen e një fëmije dy vjeç, nga një nënë shqiptare, e cila dyshohej se ishte e varur nga droga. Mesditën e sotme, mediat në Spanjë zbuluan edhe identitetin e nënës.
Ajo është Hatixhe Kamxhiu e divorcuar nga burri dhe jetonte në Spanjë prej disa vitesh. 32-vjeçarja ishte nënë e tre fëmijëve, një vajze dhe dy binjakëve. Njërin prej binjakëve ajo e vrau, ndërsa tjetrin e plagosi rëndë, sipas mediave spanjolle.
Fillimisht, Hatixhe Kamxhiu, njoftoi policinë, se djali i saj kishte përplasur kokën në tavolinën e shtëpisë, por mjekët zbuluan se ai kishte edhe fraktura të tjera, duke arritur në konkluzionin se ishte një vrasje.
Pas vdekjes së djalit të saj, 32-vjeçarja, postoi në Facebook shiritin e zi dhe të gjithë miqtë i shprehnin ngushëllimet, të cilët nuk e dinin që Hatixheja e kishte bërë vetë krimin.
Në profilin e saj në Facebook, ajo ka postuar edhe fëmijët e saj.
Të gjithë në Bigastro, Spanjë e kujtojnë shqiptaren si një grua të vetmuar me pak miq.
“Ajo ishte gjithmonë shumë nervoze, duke qortuar fëmijët e saj për gjithçka,” thotë një fqinj për EL ESPAÑOL, i cili gjithashtu ka fëmijë të vegjël dhe kujton Hatixhen me binjakët në park.
