Në Bruksel do të nisë sot punimet samiti dyditor i 27 vendeve anëtare të Bashkimit Europian, ku do diskutohet mbi procesin e zgjerimit dhe çeljes së negociatave të anëtarësimit me Bashkimin Europian.
Me sy dhe veshë nga selia e unionit do të jenë Shqipëria dhe Maqedonia e Veriut, të cilat prej 2014 kur morën statusin e vendit kandidat presin çeljen e dritës jeshile për negociatat, por edhe Kosova, e cila pret një vendim pozitiv për liberalizimin e vizave.
Ndërkohë mësohet se takimi i liderëve të BE-së dhe gjashtë partnerëve nga Ballkani Perëndimor fillon në orën 9:30 në ndërtesën e Këshillit Evropian.
BE-ja njoftoi se presin shkëmbim të mendimeve me partnerët e Ballkanit Perëndimor për mundësitë për forcimin e procesit të anëtarësimit, përkatësisht përshpejtimin e integrimit të rajonit në Bashkimin Evropian.
Gjithashtu do të diskutohet kërkesa e Ukrainës për anëtarësim të menjëhershëm në gjirin e bllokut, në një kohë kur liderët evropianë dhanë nga Kievi sinjale për një vendim pozitiv në këtë drejtim.
Projekt-konkluzionet, që do të miratohen nga udhëheqësit e BE-së për Ballkanin Perëndimor, përsërisin mbështetjen për perspektivën e anëtarësimit në BE për vendet e rajonit, duke bërë thirrje për reforma të vazhdueshme dhe zgjidhjen e çështjeve të hapura dypalëshe, duke përfshirë normalizimin e marrëdhënieve Kosovë-Serbi.
Por pavarësisht synimeve duket se do të jetë e vështirë që BE-ja t’i japë një përgjigje pozitive Maqedonisë së Veriut dhe Shqipërisë, kjo pasi një veto e Bullgarisë mbetet ende në fuqi për fqinjin tonë lindor dhe procesi do të vështirësohet edhe më pas rrëzimit të qeverisë së Kiril Petrov, mbrëmjen e djeshme.
