Kryeministri Edi Rama ka komentuar sërish cmimet e larta të hoteleve në jug të vendit duke thënë se vendosin 200-300 euro nata kur kanë cilësi shërbimesh. Këto çmime i cilëson tërësisht të palogjikshme.
“Do të nisë puna për inertet në bregun e Jonit. Do hapet një landfill që do të ndihmojë bashkitë e përfshira në zhvillimin intensiv për ndërtimin e hoteleve, të strukturave të mikpritjes që e kanë vënë në një sfidë goxha të madhe të gjithë qeverisjen vendore të zonës për shkak të volumeve të mëdha që krijohen. E domosdoshme është nxjerrja e një mësimi të rëndësishëm të gjithë bregut nga Vlora në Sarandë për çmimet. Nuk i vendosin bashkitë çmimet, por kanë në dorë të jenë proactive dhe të luajnë rol sa ndërveprues aq edhe nxitës, patjetër dhe influencues.
Në këtë rast është ekonomia që ndikohet nga marrëzia e vendosjes së çmimeve që e bëjnë shumë më të lehtë të shkosh në Greqi apo Turqi sesa të rrish në Dhërmi. Është i mrekullueshëm por jemi larg së garantuari cilësi shërbimesh. Hap një derë dhe kërcet 200-300 euro natën, është e palogjikshme”, tha Rama.
