Një 36-vjeçar shqiptar është dënuar me 15 vjet e 4 muaj burg dhe 120 mijë euro gjobë si dhe me dëbim nga Italia pasi u kap me 20 kilogramë kokainë.
Sipas denoncimeve, në makinën e tij i ishin gjetur më parë rreth 10 kilogramë kokainë. Në atë moment, kuptohet, karabinierët e kishin zhvendosur vëmendjen edhe në shtëpinë e tij, ku kishin gjetur edhe 10 kilogramë të tjera kokainë. Vlera e përafërt, disa milionë euro.
Shqiptari, i paidentifikuar nga mediat italiane, ka kërkuar gjykim të shkurtuar, por gjykata e Rovigos nuk e mori parasysh duke e dënuar me 15 vjet burg. 36-vjeçari shqiptar ishte përfshirë edhe më parë në rastet e trafikut të drogës. Në vitin 2016, në fakt ai ishte arrestuar në Padova, pasi sipas akuzave, në shtëpinë e tij në Campodarsego, ishin gjetur 75 kilogramë marijuanë, 11 kilogramë heroinë dhe një kilogramë kokainë.
