Nga Elton Qyno
Gjykata e Sarandës, ka refuzuar të lirojë nga qelia Romina Pulaj, ish-drejtoreshën e Inspektoriatit Ndërtimor Urbanistik të bashkisë së këtij qyteti.
Pulaj akuzohet për “Shpërdorim detyre”, pasi lejoi ndërtimin e një pallati 7 katësh në qytetin e Sarandës.
Dy ditë më parë, ajo ju drejtua gjykatës së Sarandës me argumentin se kërkonte zëvendësimin e masës së sigurisë nga “arrest në burg” në “Arrest shtëpie”. Kjo kërkesë u bazua, duke ju referuar gjëndjes jo të mirë shëndetësore.
Romina Pulaj, u arrestua më 22 shkurtit 2022.
Ish-kryeinspektorja në bashkinë Sarandë, pak ditë pas arrestimit nga prokuroria e qytetit, u shtrua në spitalin e Burgut në Tiranë, për shkak të problemeve të befasishme me shëndetin, të cilat filluan menjëherë pasi gjykata Sarandë, urdhëroi mbylljen e saj në burg.
Duke shfrytëzuar dhe situatën shëndetësore, Pulaj kërkoi nga gjykata e Apelit Gjirokastër, një masë më të butë, me qëllimin lirimin nga burgu. Por në fakt gjykata e Gjirokastrës refuzoi të pranojë kërkesën e saj.
Operacioni për arrestimin e zyrtares së Partisë Socialiste që shërben pranë INUV-it Sarandë, është kryer nga komisariati i Policisë dhe prokuroria e qytetit, e cila kishte lëshuar një mandat arresti për Romina Pulaj dhe biznesmenit, Pando Papuçi.
Ndërsa biznesmeni Pando Papuçi, është larguar duke ju fshehur policisë dhe ende deri tani nuk është arrestuar nga policia.
Në kërkim për situatën e ndërtimit të një pallatit në Sarandë është dhe inspektori i INUV Sarandë, Martin Arapi dhe Nertion Jano, të cilët ende nuk janë arrestuar nga policia e këtij qyteti, megjithëse ndaj tyre ka një masë sigurimi “arrest në burg”.
