Tashmë jemi shumë pranë fillimit të sezonit të ri futbollistik dhe skuadrat duken gati pasi kryesisht i kanë transferuar lojtarët që kanë pasur si objektiva. Në faqet e para të mediave sportive e kanë larguar disi fokusin nga merkato verore edhe pse ajo është e hapur dhe për 28 ditë.
Ndjekim disa nga titujt kryesorë të mediave sportive:
“La Gazzetta dello Sport” në faqen e pare hapet me ardhjen zyrtare të Charles De Ketelaere në Milano dhe ka si titull “Derbi”. Belgu nënshkroi për pesë vite dhe zgjodhi fanellën me numrin 90. Nga ana tjetër do të jetë rival me numrin 90 të Interit dhe bashkëkombasin e vet, Romelu Lukaku.
“Alarmi te Juve” është titulli i “Corriere dello Sport”. Mesfushori francez, Paul Pogba, në fakt ka vendosur që të mos operohet në meniskun e tij sepse dëshiron të ruajë pjesëmarrjen në Botëror.
“Tuttosport” ka shkruar gjithashtu për mesfushorin francez “Pogba 35 ditë jashtë, me rrezik”. Ai do të jetë jashtë vetëm për një muaj apo më shumë. Kështu ‘ Oktapodi ‘ do të marrë pjesë në Botërorin e Katarit me Francën. Megjithatë, ekziston rreziku i rikthimit për bianconerët.
“Nëntë e jashtëzakonshme” është titulli i madrilenes “AS”. Ancelotti i jep dritën jeshile skuadrës pa nënshkrimin e një qendërsulmuesi pavarësisht largimit të Mayoral. Ai konfirmon Hazard si zëvendësues të Benzemas.
Katalanasja “Sport” shkruan “Lëvizja e radhës”. Chelsea fillon negociatat për nënshkrimin e De Jong dhe Barça kërkon 80 milionë. Bernardo Silva po pret largimin e holandezit për të shkuar në Camp Nou.
Prestigjozja “Marca” fokusohet tek madrilenët duke shkruar “Mbreti i finaleve”. Që nga hapja e epokës së tyre të dytë të artë në 2014, Madridi ka fituar 16 nga 18 ndeshjet vendimtare.Kanë mbetur edhe 7 ditë për Superkupën e Europës.
“Operacioni Dalje” është titulli i “Mundo Deportivo”. Barça përshpejton në disa fronte për të përmbushur reduktimin e nevojshëm të skuadrës.
