Tre kampionate ‘big’ nisin në ditën e sotme dhe fokusi është kthyer plotësisht aty. Spektakli ka filluar dhe ky vit premton shumë dhe në disa kampionate pritet një rivalitet i fortë.
Ndjekim disa nga titujt kryesorë të mediave sportive:
“Shfaqja filloi” është titulli i madrilenes “AS”. Tre kampionate të mëdha futbolli nisin sot : Premier League, Bundesliga dhe Ligue 1. Haaland, Mané dhe Mbappé, mes yjeve të tjerë, ndriçojnë garat e tyre.
Prestigjozja “Marca” fokusohet tek sporti i kryeqytetit spanjoll dhe shkruan “Duam gjashtë tituj”. Këto ishin fjalët e Carlo Ancelotti në intervistën e fundit të klubit.
“Aubameyang nuk largohet” ka shkruar katalanasja “Mundo Deportivo”. Gabonezi, i kërkuar nga Chelsea, as që mendon të largohet nga Camp Nou.
“Kërkimi për një mbrojtës anësor” është titulli i “Sport”. Azpilicueta nuk pret Barçën dhe zgjat marrëveshjen me Chelsean deri në vitin 2024. Klubi është në kërkim të alternativave dhe një prej tyre është Meunier nga Borussia Dortmund.
“L’Esportiu” kujton kohët e vjetra duke shkruar “Nostalgji”. Fansat e Barçës kujtojnë me mall se pikërisht një vit më parë Barcelona tronditi futbollistin botëror duke njoftuar fundin e një lidhje 21-vjeçare me Leo Messin, i cili as nuk mundi të thoshte lamtumirë në stadium.
“Po, për Juventusin” është titulli i torinezes “Tuttosport”. Drejtuesit e Juventusit përshpejtojnë për anësorin serb Kostiç pas festës së Villar Perosa.
“La Gazzetta dello Sport” hapet me titullin drejtuar kuqezinjve “Milani im, edhe më i forte”. Stefano Pioli është intervistuar në Gazzetta dello Sport mëngjesin e sotëm. Biseda e gjatë meritoi një vend të spikatur edhe në faqen e parë të edicionit të sotëm.
