Prej 2 muajsh ka hyrë në në fuqi leja e re e qarkullimit për të gjitha mjetet që qarkullojnë në vend, me shumë avantazhe për drejtuesit e mjeteve, duke filluar nga kostoja.
Përfitimet janë vënë re që muajt e parë, ndaj ditën e sotme kryeministri Edi Rama ka shkruar në Facebook se ka ulur me 40% kostot për qytetarët, pasi tashmë kushton më lirë, 2.100 lekë nga 3.500 lekë. Nga kjo ulje prej dy muajsh u janë kursyer 45.813,600 lekë qytetarëve.
“Leja e re e qarkullimit kushton 40% më lirë; Kursen kohë pritje e shërbimi për qytetarët dhe nuk ka afat skadence; Ofron elemente sigurie e cilësi të lartë, të dhëna të kodifikuara sipas BE”, shkruan Rama krahas videos.
Leja e re e qarkullimit ka zëvendësuar tre dokumente, lejen e vjetër të Qarkullimit, certifikatën e pronësisë dhe lejen ndërkombëtare të mjetit.
Leja e re e qarkullimit e mjetit lëshohet për regjistrime të reja ose kur qytetari azhurnon të dhënat e mjetit, kur ndërron pronësinë, kur humb apo dëmtohet leja e vjetër dhe kur qytetari dëshiron vetë të marrë lejen e re. Nuk ka detyrim për mbajtësit e lejes së vjetër të mjetit që ta ndërrojnë atë.
