Presidenti, Bajram Begaj, do të vizitojë Kosovën të hënën me 15 gusht, e para vizitë e tij jashtë vendit që prej kur mori detyrën në 24 korrik. Lajmi u bë me dije ditën e djeshme nga zyra e shtypit të Kuvendit të Kosovës.
Sakaq, sot është zbardhur axhenda e vizitës së Presidentit.
Begaj mbërrin të hënën në Kosovë me ftesë të presidentes Vjosa Osmani, e cila në orën 10:00, do ta presë presidentin me ceremonitë më të larta shtetërore, në sheshin “Ibrahim Rugova”, në Prishtinë.
Sipas njoftimit, mediat duhet të jenë në ndërtesën e Kuvendit të Kosovës në orën 09:15.
“Pas ceremonisë së pritjes, presidentja Osmani Sadriu zhvillon takim me presidentin e Begaj, si dhe në fund të takimit do të kenë deklaratë të përbashkët për media”, thuhet në njoftim.
Ish-gjeneralmajori ishte propozim i Partisë Socialiste dhe mori besimin e shumicës së deputetëve në Kuvend për të qenë Presidenti i ri i Republikës së Shqipërisë së seancën parlamentare të 4 qershorit 2022 me 78 vota pro, 4 kundër dhe 1 abstenim.
