Dokumentari “Rasti Figo: Transferimi i Shekullit” nga David Tryhorn, Ben Nicholas dhe Pitch International do të shfaqet premierë në Netflix sot, më 25 gusht, dhe “përqendrohet në një nga transferimet më të diskutueshme në historinë e futbollit dhe lojtarin e jashtëzakonshëm në sy të uraganit: Luís Figo”.
“The Independent” ishte në gjendje të shijonte një pamje paraprake të “Çështja Figo” dhe publikon se dokumentari shpjegon se si një gënjeshtër e Paulo Futre drejtuar Florentino Pérez ndikoi drejtpërdrejt që Luis Figo të përfundonte nga Barcelona te Real Madridi.
Paulo Futre, ylli i Atlético Madridit, dhe Florentino Pérez, në atë kohë kandidat për presidencën e Real Madridit, mbajtën një takim në të cilin Florentino informoi Futre për interesin e tij për të nënshkruar me Figo, duke paguar klauzolën e përfundimit të kontratës së portugezit me Barcelonën.
Sipas gazetës britanike, Futre telefonoi agjentin José Veiga, agjentin e Luis Figo, teksa ishte përballë Florentino Pérez, për ta informuar…, por përfundoi duke e mbyllur telefonin. Futre pretendoi se ishte ende i lidhur me telefonatën kur kuptoi se Florentino Pérez kishte vërtet para për të paguar klauzolën e Figos dhe foli për kryerjen e operacionit.
“Ato 30 apo 40 sekonda në të cilat pretendoja se flisja me José Veiga ishin çelësi i gjithë transferimit”, – shpjegon Futre. Gazeta “Record” kujton se përfshirja e Paulo Futre në transferimin e Luis Figo te Real Madridi është zbuluar tashmë nga agjenti Vicente Montes.
“Procesi filloi rreth tre muaj para zgjedhjeve. Paulo Futre dhe José Veiga, i cili ishte menaxheri i Figos, më thirrën. Paulo më kishte pyetur më parë, pa më thënë se kush ishte lojtari, nëse ai mund të punësonte një futbollist konkretisht. Pak orë para takimit kuptova se bëhej fjalë për Real Madridin dhe Figon”, – shpjegoi Vicente Montes.
Më në fund, Florentino Pérez fitoi zgjedhjet dhe Real Madridi i pagoi Barcelonës 60 milionë euro për klauzolën e përfundimit të kontratës së Figos. “Nënshkrimi i shekullit” ka edhe dëshminë e vetë ish-lojtarit portugez: “Shumë njerëz kanë folur pa e ditur për nënshkrimin, por unë e di historinë e vërtetë, sepse unë jam protagonisti”.
Dokumentari, me më shumë se 30 orë intervista, ka versionet e të gjithë të përfshirëve në transferimin e Figo te Real Madridi. “Kush mendoni se po thotë të vërtetën?” – pyetet Florentino Pérez gjatë dokumentarit. “Pa dyshim, unë jam protagonist. Gjithçka që do t’ju tregoj është ajo çfarë ndodhi”, – përgjigjet presidenti i të bardhëve.
