Në ditën e djeshme është hedhur shorti për fazën e grupeve të UEFA Champions League, si dhe janë dhuruar çmimet: Lojtari i vitit dhe Trajneri i vitit. Prandaj fokusi i mediave sportive në ditën e sotme do të jetë pikërisht këtu.
Ndjekim disa nga titujt kryesorë të mediave sportive:
Gazeta madrilene “AS” e hap ditën sot duke shkruar në titullin kryesor: “Më të mirët”. UEFA shpall Karim Benzema, Alexia Putellas dhe Carlo Ancelotti si më të mirët në Europë për sezonin 2021/2022.
“Bomba e kampionëve” shkruan katalanasja “Sport”. Barça është në grupin e vdekjes me Bayernin, Interin dhe Viktoria Plzen. Lewandowski do të provojë veten në rikthimin e tij në Mynih.
Prestigjozja “Marca” e konsideron ditën e djeshme si “E shkëlqyeshme!”. Futbolli spanjoll dominon çmimet kontinentale.
“Shorti i Kampionëve Brutal” është titulli i “Mundo Deportivo”. Barça do të përballet me një grup shumë të vështirë me Bayernin, Inter dhe Viktoria. Benzema dhe Ancelotti janë lojtarët dhe trajneri më i mirë përkatësisht. Alexia përsërit mbretërimin.
“La Gazzetta dello Sport” hapet me shortet e grupeve: “Kampionë, ne të katër”. Inter ka grupin më të vështirë, Milani shkoi mirë, Juve përplaset me PSG, kurse Napoli ëndërron.
“Po bëhet serioze” shkruan gazeta italiane “Corriere dello Sport”. Lazio-Inter është ndeshja e parë e madhe në këtë sezon të ri.
“Tuttosport” hapet me zërat e merkatos: “Juve edhe Paredes”. Negocimi i detajeve me PSG-në, kërkohet një marrëveshje për formulën: bardhezinjtë shtyjnë për huazimin pa detyrim blerjeje ose me detyrim në kushte të caktuara.
