Pas rastit të Shqipërisë, që “ra pre” e sulmeve kibernetike, që nxorën jashtë funksionit portalin qeveritar e-albania, një tjetër shtet i Ballkanit ka hasur kështu problemesh.
Infrastruktura informative e Qeverisë së Malit të Zi ra pre e një sulmi kibernetik nga një vend i panjohur para pak ditësh, me qëllim që të kriptonin të dhënat e ruajtura në sistem, raportojnë mediat vendase. Ekspertët pohojnë se nuk ia kanë dalë mbanë, ndonëse të dhënat paraprake tregojnë se këto janë sulmet më të sofistikuara që kanë ndodhur deri më tani në Mal të Zi.
Sakaq, Agjencia e Sigurisë së Malit të Zi (ANB) konfirmoi më 26 gusht për Radion Evropa e Lirë se shërbimet ruse ishin përgjegjëse për një sulm të fuqishëm kibernetik që preku të gjithë strukturën shtetërore të informacionit të Qeverisë së Malit të Zi.
Sipas agjencisë, sulmi i së premtes ishte i parapërgatitur prej kohësh dhe se një sulm i të tilla përmasave ishte i paprecedentë në shtetin ballkanik.
Më herët, kryeministri me mandat teknik, Dritan Abazoviq, konfirmoi se qeveria e Malit të Zi është sulmuar nga hakerat për herë të dytë në pesë ditë, duke i quajtur sulmet të motivuara politikisht.
Ministri i Administratës Publike Marash Dukaj tha se objektivi kryesor është struktura e organeve shtetërore”, tha Dukaj, duke shtuar se “aleatët janë informuar” për sulmet.
