Për rreth dy dekada, përkthyesi Edvin Shvarc ka punuar në institucionin e Presidencës, duke i shërbyer me përkushtim 4 krerëve të shtetit. Por dy ditë më parë, djali i përkthyesit të madh, Robert Shvarc është pushuar nga puna nga Presidenti aktual Bajram Begaj.
Edvin Shvarc mbante postin e drejtorit të informimit publik dhe marrëdhënieve me jashtë në Presidencë, por në shkresën e firmosur nga sekretari i përgjithshëm i presidentit thuhet se largimi nga kjo detyrë është bërë për shkak të panjehsimit të diplomës së tij të huaj nga ministria përkatëse e Arsimit.
Po ashtu, Shvarc i kërkohet që të bëjë dorëzimin e të gjitha materialeve dhe dokumentacioneve.
Pas shkarkimit të tij nga detyra, të shumta kanë qenë reagimet, kryesisht nga opozita. Deputeti Agron Gjekmarkaj i kërkon Presidentit dhe e këshillon atë që ta rikthejë në detyrë Edvin Shvarcin.
“Zoti President ktheje Shvarcin aty ku ishte, ky gjest mund të të merret për mirë, si gjest i njeriut që di të kuptojë gabimet e veta, këshillat e këqija dhe kërkesat mujshare. Korrigjimi i gabimit nuk është dobësi. Kur shembulli mungon në Presidencë, kur shteti goditet bash aty në ligj por edhe në mistiken e tij mbrojtëse për më poshtë mbetesh pa tekst”, thekson ndër të tjera Gjekmarkaj.
Deputeti Flamur Noka thotë se ai është shkarkuar pa ndonjë motivacion.
“Pas 19 vitesh punë në institucionin e Presidencës, ku shërbeu me profesionalizëm e korrektesë për 5 presidentë të ndryshëm, Edvin Robert Shvarc pushohet nga puna me një motivacion qesharak të shkruar në letër, pa i thënë një fjalë. Mungesë e madhe respekti nga Presidenti i Republikës ndaj një nëpunësi civil, i cili jeton me të ardhurat e kësaj pune në një apartament modest bashkë me zonjën dhe nënën e tij.
Edvin Shvarc është shtetas shqiptar me prejardhje hebreje, zyrtar serioz dhe profesionist i rrallë.
Ky akt i shëmtuar njollos institucionin më të lartë të shtetit. Presidenti Begaj nxitoi të shfaqte veten pa mbushur muajin në detyrë”.
Edhe deputeti tjetër Edmond Spaho thotë se edhe pse Shvarc është një profesionist, për Presidentin këto cilësi nuk vlejnë.
“Këto cilësi nuk vlejnë për Presidentin katunar të Rilindjes. Duhet te jesh patronazhist qe te punësohesh. Kjo është Shqipëria e Edi Rimës dhe krijesës se tij Bajram Begaj”, shkruan ndër të tjera Spaho.
