Gjykata e Elbasanit i ka lënë në burg tre të hetuarit për rastin e Uzinës Ushtarake të Gramshit në Shqipëri, ku dy ushtarë shqiptarë u plagosën dhe dy shtetas rusë e një ukrainas u akuzuan nga Prokuroria e Elbasanit për spiunazh si edhe për ushtrimin e dhunës ndaj punonjësve të shtetit.
Mirëpo, Fedir Alpatov, ukrainasi ka ankimuar masën e sigurisë ‘Arrest me burg’ duke kërkuar një masë më të lehtë. Në dokumentin e siguruar nga Shqiptarja.com, Alpatov kërkon që të lihet në ‘detyrim paraqitje’ dhe jo në burg deri në përfundim të hetimeve.
Ai thotë se duhet të vazhdojë shkollën që të mos humbasë vitin, duke theksuar se nuk ka asnjë rrezikshmëri për t’u arratisur.
Avokati i tij, Saimir Vishaj thotë se ndalimi i tij ka qenë jo i drejtë pasi, Alpatov nuk është spiun, por një njeri që ka hobi fotografimin e bunkerëve dhe reparteve të braktisura.
“Nuk ka qenë në vendin e ngjarjes kur është hedhur Spraj neoparalizues dhe së dyti nuk ka asnjë lidhje me asnjë agjenci spiunazhi, qëllimi i vërtetë i ardhjes në Shqipëri ka qenë për hobi për të shkuar në vendet ish-komuniste dhe fotografimi i bunkerëve apo reparteve të braktisura duke i nxjerrë më pas në rrjetet sociale, instagram. Në Shqipëri ndodhej për pushime ku lekët e sekuestruara prej 6000$ ia kishte dhënë mamaja e tij, Ilona për pushime të cilat janë sekuestruar”, vijon dokumenti.
