Kundërofensiva e forcave ukrainase në jug, në Kherson, do të jetë e ngadaltë, por e suksesshme.
Kështu ka deklaruar këshilltari presidencial Oleksiy Arestovych, duke nënvizuar se është “një operacion i ngadaltë i planifikuar për të shtypur armikun, duke shpëtuar jetën e ushtarakëve dhe civilëve”, sipas La repubblica.
Presidenti ukrainas, Volodymyr Zelensky, u ka bërë thirrje trupave ruse që të largohen nga ofensiva e nisur.
Sipas Zelenskyt, trupat ukrainase janë duke rimarrë kontrollin e territorit të tyre. Në një video-mesazh të postuar mbrëmë, Zelensky u zotua se trupat ukrainase do të ndjekin ushtrinë ruse “deri në kufi”.
“Nëse duan të mbijetojnë – është koha për ushtrinë ruse që të ikë. Shkoni në shtëpi. Ukraina po rimerr territorin e saj”, theksoi Zelensky.
Ndërkaq, inspektorët nga Agjencia Ndërkombëtare për Energji Bërthamore janë nisur për të inspektuar centralin Zaporizhja, që është nën kontrollin rus. Ky central ra në duart e rusëve disa ditë pasi Rusia nisi pushtimin e Ukrainës më 24 shkurt.Luftimet e fundit përreth centralit të Zaporizhjas – që është më i madhi në Evropë – kanë rritur frikën për ndonjë incident bërthamor.
