Parku i Madh i Liqenit Artificial përbën masivin më të madh të gjelbërimit në qytetin e Tiranës, ndaj është “destinacioni” i preferuar i banorëve të kryeqytetit, për të kaluar pasditet dhe fundjavën.
Ndaj, së fundmi i është shtuar një kënd argëtues për fëmijë e të rritur, në kuadër të nismës së Bashkisë së Tiranës, “Luaj Tirana”.
Përmes një postimi në rrjete sociale, kryebashkiaku Veliaj njoftoi instalimin e 6 moduleve force dhe disa tavolinave për lojëra, për të gjithë të apasionuarit pas stërvitjeve në natyrë.
“Shtatori nisi me punë të bukura në Parkun e Liqenit! 6 modele force, tavolina për shah e ndriçim! – Ideal për gjyshërit dhe sportistët e qytetit”, tha Veliaj.
Në Parkun e Liqenit, Bashkia e Tiranës ka ndërtuar disa kënde sportive, ndërsa nuk mungojnë as hapësirat e dedikuara për fëmijët dhe për moshat e treta.
