Me largimin nga kreu i Agjencisë së Mbikqyrjes Policore Muhamet Rrumbullaku i cili mban gradën e drejtuesit të lartë pritet të marrë postin e drejtorit të Përgjithshëm të Policisë.
Sipas Report TV, Rrumbullaku do te propozohet nga ministri i Brendshëm z. Çuçi në qeveri për tu emëruar drejtor i policisë.
Propozimi pritet të bëhet në fillim jave dhe në mbledhjen e qeverisë ditën e mërkurë të shqyrtohet ky propozim.
Ky emërim i z. Rrumbullaku vjen pas shkarkimit të ish-drejtorit Gledis Nano. Ai u shkarkua të mërkurën e kaluar me vendim të qeverisë, me argumentin se nuk i ka realizuar objektivat. Në vendin e tij, deri në emërimin e drejtorit të ri, do të jetë i komanduar nëndrejtori, Tonin Vocaj.
Ndërkohë që 2 ditë më parë u konfirmua se Ardi Veliu do të jetë Drejtori i ri i Agjencisë së Mbikëqyrjes Policore (AMP). Veliu është prezantuar , teksa vjen në këtë post në vend të Muhamet Rrumbullakut.
Kush është Muhamet Rrumbullaku
Muhamet Rrumbullaku u lind më 1 shkurt 1966 në qytetin e Tiranës. Ai është diplomuar “Specialist i Lartë Policie” në vitin 1988 pranë Akademisë së Policisë, ndërkohë që është diplomuar në Fakultetin e Drejtësisë Tiranë dhe ka marrë titullin Jurist në vitin 2010. Gjithashtu ka edhe një Master Profesional në vitin 2011.
- Rrumbullaku ka patur një karrierë të gjatë në këtë profesion. Nga data 24/03/2022 me propozim të Ministrit të Brendshëm, Z. Bledi Çuçi, Kryeministri Edi Rama e ka emëruar si Drejtor i Përgjithshëm të Agjencisë së Mbikëqyrjes Policore.
Më parë ai ka mbajtur pozicione drejtuese në policië e shtetit. Nga data 17/01/2019 deri më 23/03/2022 ka mbajtur postin e Drejtorit të Përgjithshëm të Shërbimit për Çështjet e Brendshme dhe Ankesat në Ministrinë e Brendshme. Ka mbajtur postin e Këshilltarit në Kabinetin e Ministrit të Brendshëm, ka mbajtur postin e Shefit të Seksionit për trajnimin dhe shkollimin e nivelit të mesëm e të lartë Drejtues, në Qendrën e Formimit Policor e shumë pozicione të tjera.
