Kryeministri Edi Rama ka dhënë një intervistë për revistën gjermane “Der Spiegel” ku ka folur edhe për pavarësinë e Kosovës si dhe për luftën në Ukrainë.
Rama është shprehur për revistën gjermane se vendimi për pavarësinë e Kosovës ishte i duhuri dhe se tashmë Serbia e Kosova janë në një proces pajtimi.
Ai shtoi se Putini vazhdon dhe e përmend Kosovën, duke theksuar se Rusia po nxit konfliktin në Ballkan dhe po rrezikon paqen e brishtë.
“Vendimi për pavarësinë e Kosovës ishte i duhuri. Në fund të fundit, tani ka edhe një proces paqeje dhe pajtimi, edhe nëse do të vazhdojë për një kohë të gjatë. Putin thotë: Kosova, Kosova, Kosova. Rusia po nxit konfliktin në Ballkan dhe po rrezikon paqen e brishtë. Ajo do të ishte e kënaqur nëse diçka do të lëvizte në drejtim të konfliktit”, ka thënë Rama.
Kryeministri Rama u shpreh se kohët e fundit në Ballkan ka nisma inkurajuese si ajo e “Ballkanit të Hapur”, duke përmendur ish-kancelaren Angela Merkel, e cila sipas tij ka mbështetur nismën përmes “Procesit të Ballkanit”.
“Kohët e fundit ka pasur edhe zhvillime inkurajuese në Ballkan. Kështu që unë dua që Serbia, Shqipëria dhe Mali i Zi të krijojnë një lloj minizone Schengen për të bërë shkëmbime më të mira”.
