Presidenti i Serbisë Aleksandër Vuçiç ka pritur sot në një takim në Beograd presidentin turk Rexhep Taip Erdogan. Vuçiç ka thënë se marrëdhëniet ekonomike Serbi-Turqi janë në nivelin më të mirë, ndërsa kompanitë turke kanë punësuar mbi 10 mijë serbë.
Vuçiç i kërkoi Erdogan që t’i sigurojë Serbisë një linjë direkte për transmetimin e energjisë nga Azerbajxhani, ndërsa tha se vendi i tij do të blejë dronë luftarakë “Bayraktar”.
“Nuk është turp ta them, jemi në radhë për Bayraktar, do t’i marrim vitin që vjen. Jemi të gatshëm që paguajmë shumë më tepër nga çfarë kemi ofruar fillimisht. Do të paguajmë disa qindra milionë”, u shpreh Vuçiç.
Vuçiç tha se Europën e pret një “dimër polar”, ndërsa shtoi se vendi i tij duhet të marrë masa për kursimin e energjisë.
“Kam frikë se të gjithë presin humbjen e palës tjetër, jo një kompromis. Nëse mendoni se do ta mposhtni Rusinë ushtarakisht, gjithçka që duhet të bëjmë është të përgatitemi për dimrin polar,” tha ai.
