Detaje të reja janë zbardhur në lidhje me rastin e dy rusëve dhe ukrainasit të arrestuar në Gramsh pasi akuzohen për spiunazh. Sipas “TCH” përveç 1 fisheku 5.56 mm, 6.000 dollarëve dhe disa telefonave celularë, në makinën që përdorej nga shtetasit e huaj janë gjetur edhe tre lingota ari.
Hetuesit kanë dyshime se këto lingota ari do të përdoreshin nga Rusia për të paguar personin i cili do t’iu ofronte të huajve informacione të sakta për objektet strategjike dhe bazat ushtarake ne Shqipëri.
Pesha e këtyre lingotave është 10, 20 dhe 100 gram ar dhe kapin vlerën e më shumë se 12 mijë eurove. Duke ditur se lingotat janë lehtësisht të transformueshme në forma të tjera dhe të lehta në transportim, autoritetet shqiptare dyshojnë se ato janë kërkuar nga personi që do të tradhtonte shtetin shqiptar në vend të parave.
Ky person që do të tradhtonte shtetin shqiptar dyshohet të jetë i lartë, njohës i mirë i informacioneve të klasifikuara dhe me përvojë në fushën e agjenturës sekrete.
