Max Verstasppen me Red Bull fiton edhe garën e Çmimit të Madh të Italisë në Formula 1, zhvilluar në pistën e Monza-s, “shtëpinë” e Ferrari. Ky është suksesi i 11-të sezonal për pilotin holandez, i pesti radhazi, në një kampionat ku po dominon e po shkon drejt konfirmimit si kampion bote.
Gara u mbyll nën regjimin e makinës së sigurisë, e cila hyri në pistë 5 xhiro nga fundi, pas aksidentit të Daniel Ricciardo. Pista nuk u bë gati dhe në finish mbërriti e para makina e sigurisë e pas saj të gjithë pilotët, duke bërë që gara të humbasë spektaklin në fundin e saj. Gjithsesi, Verstappen e meritoi fitoren.
Edhe pse e nisi garën nga vendi i shtatë, ai arriti të rikuperojë në pistë, ndërkohë që përfitoi edhe nga një strategji ndryshe e Ferrari me Charles Leclerc. Ky i fundit bëri dy ndalesa, me shpresën që të fitojë, por në përfundim kjo doli një lëvizje e gabuar dhe e mbylli garën i dyti edhe pse e nisi atë nga “pole”.
Në podium u ngjit edhe britaniku i Mercedes, George Russell, duke lënë pas Carlos Sainz (Ferrari), Lewis Hamilton (Mercedes) e Sergio Perez (Red Bull). Këta të tre e nisën garën nga vendet e fundit dhe bënë një rikuperim të mirë. Në “top-10”, pra në zonën e pikëve, u klasifikuan edhe Norris, Gasly, De Vries e Zhou.
