Edhe pse pritej një përgjigje pas garës së Monza nga ana e skuadrës Haas për të mësuar të ardhmen e Mick Schumacher, ende asgjë zyrtare nuk është mësuar për të ardhmen e pilotit të ri gjerman. Edhe pse arriti të marrë disa pikë këtë sezon, rendimenti i makinës amerikane ra e po ashtu edhe rezultat e saj në pistë.
Shefi i Haas, Gunther Steiner, duke sqaruar situatën shprehet: “Nuk kemi vendosur ende se cili do të jetë piloti ynë i dytë sezonin e ardhshëm. Po analizojmë e vlerësojmë të gjitha opsionet për të mirën e skuadrës. Nuk e dimë nëse Mick do të jetë ende me ne apo jo, ndërkohë që do të vijojmë bashkëpunimin me Ferrari”.
“Ka zhvilluar disa gara të mira, por nuk ka patur vijueshmëri përgjatë gjithë sezonit.
Ne nuk nxitohemi për të marrë një vendim, ndaj Mick ka ende mundësi të tregojë aftësitë e tij. Unë kam biseduar me disa pilotë, kjo është puna ime, por nuk duam të rrezikojmë. Duam një pilot me përvojë, por edhe që të jetë në formë”, tha Steiner.
