Presidenti rus Vladimir Putin, këtë të mërkurë mbajti fjalimin e jashtëzakonshëm në lidhje me luftën e Rusisë në Ukrainë. Ai akuzoi Perëndimin për përfshirje në shantazh bërthamor kundër Rusisë, duke theksuar se Rusia është e gatshme të përdorë të gjithë arsenalin ushtarak, duke mos përjashtuar as përdorimin e armëve bërthamore.
Pas deklaratave të forta, kanë ardhur dhe reagimet e para nga Perëndimi.
Ka qenë ministrja e Jashtme e Britanisë së Madhe, Gillian Keegan, e cila tha se kërcënimet e tij duhet të merren seriozisht.
“Është e qartë se është diçka që duhet ta marrim shumë seriozisht sepse, ju e dini, ne nuk e kemi kontrollin. Ky është padyshim një përshkallëzim”, tha ajo.
Gjithashtu edhe ministri i Ekonomisë në Gjermani reagoi duke thënë se bëhet fjalë për një lëvizje të keqe nga ana e liderit rus dhe për një zhvillim aspak të mirë.
Kurse, ambasadorja amerikane në Kiev, Bridget Brink, e ka cilësuar njoftimin e presidentit rus Vladimir Putin si një shenjë dështimi, teksa u zotua se Shtetet e Bashkuara do të vazhdojnë të mbështesin rezistencën e Ukrainës ndaj agresionit rus.
“Referendumet e rreme dhe mobilizimi janë shenja dobësie, dështimi rus”, shkroi në Twitter ambasadorja Bridget A. Brink, vetëm pak minuta pasi kishte filluar transmetimi i fjalimit të liderit rus.
“Shtetet e Bashkuara nuk do ta njohin kurrë pretendimin e Rusisë për territorin e supozuar të ushtruar nga Ukraina dhe ne do të vazhdojmë të qëndrojmë me Ukrainën për aq kohë sa të duhet”, shtoi Brink.
