Tensionet Greqi-Turqi janë kryefjala e mediave ditët e fundit, për shkak të përplasjeve dhe retorikës së liderëve kundër njëri-tjetrit.
Së fundmi, Ministri i Mbrojtjes i Turqisë, Hulusi Akar, ka bërë kërcënime të reja ndaj Greqisë, në një intervistë të dhënë për gazetën Hurryiet dhe e cila është botuar mëngjesin e së shtunës, pak orë, pas fjalimit të Kyriakos Mitsotakis në Asamblenë e OKB-së.
Sipas Protothemës, nga Nju Jorku, Hulusi Akar iu referua Katastrofës së Azisë së Vogël, duke “këshilluar” grekët se është mirë të dish not.
Kjo referencë e fundit u bë kur Hulusi Akar iu kërkua të komentonte deklaratat e ministrit grek të Mbrojtjes, Nikos Panagiotopoulos, nga Kastellorizo.
“Ne menduam se ata kishin harruar të notonin kur pamë sjelljen e tyre sfiduese të kohëve të fundit. Nëse vazhdojnë me këtë mendësi, mësimi i notit do t’u bëjë mirë. Me gjithë qëllimet tona të mira, disa politikanë grekë vazhdojnë veprimet dhe retorikën e tyre provokuese. Ata përdorin mjete të ndryshme për të shpifur Turqinë., tha ministri turk i Mbrojtjes.
Ai pohoi, në fakt, se është Turqia ajo që fton “me ngut” palën greke në një dialog për të zgjidhur problemet dhe grekët që “i shmangen vazhdimisht dialogut”.
Në mars, mosmarrëveshja e vazhdueshme midis Athinës dhe Ankarasë për disa ishuj në Egje u qetësua përsëri për një kohë të shkurtër, por dy muaj më vonë të dy vendet vazhduan manovrat e tyre ushtarake në rajon.
