Ish-ministri i Drejtësisë, Ylli Manjani ka reaguar për fitoren e Qendrës së Djathtë në zgjedhjet në Itali me Giorgia Melonin, e cila pritet të jetë kryeministrja e parë në historinë e vendit.
Përmes një postimi në Facebook, Manjani ironizon reagimet e shkaktuara nga fitorja e Melonit dhe në mënyrë ironike ngre pyetjen “kjo Giorgia Meloni do na pushtojë gjë?”
“Ka dëgjuar njeri ndonjë llaf? Dmth, ishalla e bën dhe ajo si Duçja. Se kështu me governatorë burokratë që as të… pushtojnë e as të lëshojnë, nuk shtyhet. Më mirë Meloni sesa Yuri dhe Laja e Brukselit.”, shkruan Manjani.
Por në postimin e këtij të fundit, ka reaguar ‘me shpejtësinë e dritës’ kreu i Partisë Demokristiane, Nard Ndoka, i cili ka zgjedhur t’i ‘mbyllë gojën’ Manjanit, me deklaratën e Melonit, e cila ndër të tjera shprehet se për Sorosin, do të ishte edhe armike e BE.
“Për Sorosin, unë do isha armike e BE-së. Nga ana tjetër, mendoj se armiqtë e vërtetë të Evropës janë ata që spekulojnë me fatkeqësitë e njerëzve, ata që financojnë emigracionin masiv dhe që destabilizojnë shoqërinë dhe kulturën e popujve të tërë. Siç ndodh, të gjitha këto karakteristika që vlerëson ky ‘filantrop’, janë të vlerësuara nga e majta jonë globaliste lokale. Nëse luftimi i këtyre devijimeve do të thotë të jesh armik për Sorosin, atëherë unë jam krenare për këtë”, ishte deklarata e Melonit, të cilën Ndoka zgjodhi t’i referohej në koment.
Me komentin pikant të Ndokës është ‘pajtuar’ edhe Manjani, i cili ka replikuar duke u shprehur se edhe ai është krenar për Giorgian.
