Sekretari Organizativ i Partisë Socialiste, Blendi Klosi thotë se Erion Veliaj do të jetë sërish kandidat i mazhorancës për zgjedhjet e ardhshme vendore dhe se të gjitha sondazhet e nxjerrin atë fitues të thellë në Tiranë.
Nga ana tjetër Klosi shprehu bindjen se Veliaj do të ketë jo vetëm mbështetjen e PS, por dhe të qytetarëve për të vijuar që të drejtojë Bashkinë e Tiranës në mandatin e tretë.
“Tirana është shembulli më i plotë i të gjithë këtyre që ne folëm, mënyrën se si kemi reaguar, si kemi qeverisur. Një bashkëpunim jashtëzakonisht i suksesshëm ndërmjet qeverisë qendrore dhe lokale dhe siç e ka thënë edhe kryeministri, nuk ka arsye që Erion Veliaj të mos jetë rikandidat për bashkinë e Tiranës dhe pa dyshim të gjithë sondazhet e nxjerrin fitues të thellë të kësaj bashkie. Do ketë mbështetjen e gjithë PS, por natyrisht edhe të qytetarëve”, tha Klosi për ”Report Tv”.
Ndërkohë nga radhët e opozitës kandidatët potencialë si Jorida Tabaku apo Ilir Meta janë tërhequr nga gara përballë Erion Veliajt. Me sa duket sondazhet e tyre rezultojnë me humbje të kandidatit të opozitës.
