Është mbyllur me një rezultat tenistik dhe fitore të thellë 6-3 në favor të City-t derbi i Manchester-it kundër United. Në “Etihad Stadium” ekipi i Guardiolës e nisi me një vrull të frikshëm, pasi pjesa e parë përfundoi me shifrat 4-0.
Dy gola Foden dhe dy Halaand. Me nisjen e pjesës së dytë Manchester United shënoi golin e nderit me Antony-n, i cili hyri si zëvendësues, ndërsa menjëherë më pas klubi ‘sheik’ i dërgoi shifrat në 6-1 falë Halaand dhe Foden. Të dy futbollistët realizuan ‘tripletë’ në derbi, ndërsa deri në fund të lojës United zbuti humbjen me dy gola të Martial.
Ky derbi e futi në histori sulmuesin e City-t Halaand, pasi norvegjezi arriti ‘tripletën’ e tretë radhazi në ndeshjet e zhvilluara në shtëpi. Kur janë luajtur 8 ndeshje norvegjezi ka realizuar 14 gola. Statistika mbresëlënëse që shkaktojnë frikë dhe panik te kundërshtarët. Me këtë fitore City ngjitet në vendin e dytë me 20 pikë, 1 më pak se Arsenali kryesues.
