Me rikthimin e kampionatit pas pauzës së kombëtareve, pritej edhe reagimi i Interit që kërkonte me ngulm të kthehej te fitorja.
Roma rezultoi kundërshtar aq i vështirë sa ç’pritej duke përmbysur zikaltrit në “San Siro”, duke e bërë të pavlefshëm golin e Dimarco-s në minutën e 30-të falë një koordinimi fantastik të Dybala brenda zonës dhjetë minuta më vonë e falë një goditjeje të Smolling në pjesën e dytë.
Kështu, Kristjan Asllani nuk mundi të largohej me tri pikë në ndeshjen e tij të parë si titullar me zikaltrit, një ndeshje në të cilën skuadra e Inzaghit pësoi të katërtën disfatë në kampionat.
Interi konfirmoi se nuk e ka gjetur ende kurën për “sindromën” e përmbysjeve që e ka karakterizuar në këtë fillim sezoni, duke qenë shumë larg pritshmërive dhe më keq akoma duke u distancuar edhe më shumë nga kreu dhe nga objektivi titull.
Në një situatë të tillë, padyshim që retë e zeza janë rikthyer për Simone Inzaghin. Edhe pse u konfirmua dy javë më parë nga Steven Zhang, shqetësimi dhe irritimi i dukshëm në fytyrën e presidentit të pranishëm në shkallët e “San Siro”-s, ishin sinjali më i mirë i asaj që po zien në kampin zikaltër.
Humbja me Romën i dha vazhdimësi pakënaqësisë së Zhangut ndaj trajnerit, e nisur që me konferencën për shtyp të Inzaghit.
“Kudo ku shkoj unë, më ndjekin trofetë dhe paratë e pakësohen humbjet”, tha 46-vjeçari, fjalë që u morën si një sulm ndaj shoqërisë, sidomos në këtë situatë të vështirë financiare që klubi po kalon.
Nëse tri pikët mund të maskonin mërzitjen e numrit 1 zikaltër, ndalesa e radhës jo vetëm që i shtoi ato, por shërbeu edhe për t’u dhënë fund shanseve në dispozicion të Inzaghit.
Zhang nuk ka ndër mend t’i lejojë të tjera hapa falsë Simones që i ka konsumuar të gjitha bonuset.
Klubit i është ofruar orët e fundit Paulo Souza, ish-lojtar i Interit dhe njohës i futbollit italian falë eksperiencës së tij te Fiorentina.
Portugezi aplikon të njëjtin modul loje, por nuk bind në Milano, ndërkohë që si gjithmonë në “pole” qëndron Dejan Stankjoviç, që i ka dhënë fund aventurës në drejtimin e Crvena Zvezdës.
Ish-mesfushori zikaltër është një figurë tejet e dashur në shtëpinë e Interit, mbi të gjitha për personalitetin dhe në një moment kur Interi nuk mund të përballojë ekonomikisht asnjë prej emrave të lirë si Zidane, Tuchel apo Pochettino.
