Detaje të reja janë zbuluar nga ngjarja e rëndë e ndodhur në Greqi, ku një shqiptar 33-vjeçar rrëmbeu dhe përdhunoi ish-bashkëshorten e tij.
Gjithçka ka ndodhur në orët e para të së mërkurës së kaluar kur 33-vjeçari shqiptar ka shkuar me makinën e tij drejt shtëpisë së 28-vjeçares.
Aty autori ka futur të renë me forcë në makinë dhe janë nisur drejt zonës së Istmit. Gjatë gjithë rrugës ai e rrahu egërsisht duke e goditur me grusht në kokë dhe në trup me 28-vjeçaren të paaftë për të reaguar pasi 33-vjeçari kishte mbyllur dyert.
“Më kapi nga koka dhe po më godiste në xhamin e makinës dhe në kroskot”, ka përshkruar viktima. Më pas ish-burri i saj tentoi ta zhvishte me forcë dhe kur ajo rezistoi, ai mori një çakmak dhe i vuri zjarrin flokëve.
Ankthi për 28-vjeçaren megjithatë nuk mbaroi me kaq. 33-vjeçari në gjendje të hutuar e tërhoqi zvarrë në shtëpinë e prindërve të tij në Korint ku e përdhunoi. 28-vjeçarja nënë e dy fëmijëve ka shkuar në spital me lëndime të rënda në fytyrë dhe rrezikon një shkëputje të retinës.
