Kemi hyrë në fundjavën futbollistike dhe disa ndeshje fantastike do të na shoqërojnë. Sfidat Real Madrid-Barcelona, Torino-Juventus dhe Liverpool Manchester City, do të jenë kryefjala e mediave sportive për fundjavën.
Ndjekim disa nga titujt kryesorë për ditën e sotme:
La Gazzetta dello Sport hapet me thashethemet më të fundit të tregut për Lautaro Martinez. Sulmuesi i Interit përfundon sërish në shënjestrën e top klubeve: “Lautaro është joshëse. Psg dhe United hidhen në sulm për lojtarin por ai thotë JO.
“Max, derbi final” është titulli i të përditshmes italiane Corriere dello Sport, e cila fokusohet tek derbi i Torinos dhe me rezultatet që mund të rrjedhin prej tij për trajnerin e Juventusit, Massimiliano Allegri. Më poshtë, përballja mes lojtarëve më vendimtarë të kampionatit në këtë kohë: “Kvara-Leao, Italia është e ndarë”.
Në Spanjë, Sport hapet me titullin “Transferimet e janarit”. Laporta bën të ditur se Barça do të forcohet në merkaton e dimrit. Presidenti ruan besimin e tij te Xavi.
Prestigjiozja Marca hapet me intervistën e legjendës braziliane, Ronaldo Nazario: “Kam dy vjet e gjysmë që bëj terapi psikologjike”. Ronaldo Nazario jep një rrëfim ndryshe nga çfarë e kemi dëgjuar si zakonisht.
“Të rinjtë sundojnë” ka shkruar AS. Dhjetë startues në El Clasico janë nën 25 vjeç. Vinicius, Rodrygo dhe Valverde kanë dhënë 15 gola. Pedri dhe Gavi thelbësor për Xavin.
Mundo Deportivo shkruan për bomberin polak: Lewandowski, plaga e bardhë. Polaku ka shënuar 6 gola në 8 ndeshje ndaj Real Madrid dhe synon që edhe këtë të dielë të jetë protagonist. Laporta: Xavi do të na japë sukses.
Në Britaninë e Madhe, Mirror Sport pret ndeshjen e nesërme mes Liverpoolit dhe Manchester Cityt: “Sportet e naftës”. Klopp këmbëngul se askush nuk mund të konkurrojë me pasurinë e Cityt pasi ata mbështeten nga miliardat e naftës.
